jhagDa lagaya usne sawal-o-jawab ka

jhagḌā lagāyā us ne savāl-o-javāb kā

'ālam badal gayā dil-e-nā-kāmyāb kā

ab phir rahe ho saarī ḳhudā.ī meñ be-naqāb

kyoñ tuur par ḳhayāl thā tum ko hijāb kā

ummīd par jo yaas mirī ġhālib aa ga.ī

naqsha badal gayā dil-e-pur-iztirāb kā

taare kareñge kyā ruḳh-e-raushan se sarkashī

jhuktā hai tere sāmne sar āftāb kā

saaqī manā.ūñ maiñ bhī tire mai-kade kī ḳhair

mil jaa.e mujh ko ek piyāla sharāb kā

ab tak haiñ merī ḳhaak ke zarre bhī raqs meñ

mar kar asar ye hai dil-e-pur-iztirāb kā

mash.hūr huuñ jahān meñ 'bismil' ke naam se

kushta huuñ maiñ kisī nigah-e-barq-tāb kā

jhagDa lagaya us ne sawal-o-jawab ka

'alam badal gaya dil-e-na-kaamyab ka

ab phir rahe ho sari KHudai mein be-naqab

kyon tur par KHayal tha tum ko hijab ka

ummid par jo yas meri ghaalib aa gai

naqsha badal gaya dil-e-pur-iztirab ka

tare karenge kya ruKH-e-raushan se sarkashi

jhukta hai tere samne sar aaftab ka

saqi manaun main bhi tere mai-kade ki KHair

mil jae mujh ko ek piyala sharab ka

ab tak hain meri KHak ke zarre bhi raqs mein

mar kar asar ye hai dil-e-pur-iztirab ka

mashhur hun jahan mein 'bismil' ke nam se

kushta hun main kisi nigah-e-barq-tab ka