jhamakte jhumte mausam ka dhoka kha raha hun main

jhamakte jhūmte mausam kā dhokā khā rahā huuñ maiñ

bahut lahrā.e haiñ bādal magar pyāsā rahā huuñ maiñ

huī jab dhuup kī bārish mire sar par to kyā hogā

daraḳhtoñ ke ghane sāyoñ meñ bhī sañvlā rahā huuñ maiñ

vahī kuchh kar rahā huuñ jo kiyā mere buzurgoñ ne

na.e zehnoñ pe apne tajrbe barsā rahā huuñ maiñ

ye tohmat ḳhaak tohmat hai mire ham-jurm ham-sāyo

tumhārī umr meñ tum se kahīñ rusvā rahā huuñ maiñ

ḳhayāl aatā hai bāzāroñ kī raunaq dekh kar mujh ko

bhare dariyā meñ tinkā ban ke bahtā jā rahā huuñ maiñ

tirī āġhosh chhūTī to milī vo bad-duā mujh ko

ki ab apnī hī bāñhoñ meñ simaTtā jā rahā huuñ maiñ

'qatīl' ab tak nadāmat hai mujhe tark-e-mohabbat par

zarā sā jurm kar ke aaj bhī pachhtā rahā huuñ maiñ

jhamakte jhumte mausam ka dhoka kha raha hun main

bahut lahrae hain baadal magar pyasa raha hun main

hui jab dhup ki barish mere sar par to kya hoga

daraKHton ke ghane sayon mein bhi sanwla raha hun main

wahi kuchh kar raha hun jo kiya mere buzurgon ne

nae zehnon pe apne tajrbe barsa raha hun main

ye tohmat KHak tohmat hai mere ham-jurm ham-sayo

tumhaari umr mein tum se kahin ruswa raha hun main

KHayal aata hai bazaron ki raunaq dekh kar mujh ko

bhare dariya mein tinka ban ke bahta ja raha hun main

teri aaghosh chhuTi to mili wo bad-dua mujh ko

ki ab apni hi banhon mein simaTta ja raha hun main

'qatil' ab tak nadamat hai mujhe tark-e-mohabbat par

zara sa jurm kar ke aaj bhi pachhta raha hun main