jhil ka darpan roz laja kar bel nihaara karti hai

jhiil kā darpan roz lajā kar bel nihārā kartī hai

phir chupke se lipaT peḌ se zulf sañvārā kartī hai

bachchoñ ke kanchoñ kī gūñjeñ zarā dhyān se sun lenā

mandir kī ghanTī un kī hī naql utārā kartī hai

phal de de kar ḳhush ho lenā junūñ purānā peḌoñ kā

par duniyā har pāgal ko patthar hī maarā kartī hai

laḌkī hai yā jādū-garnī vo ham mūrakh kyā jāneñ

jaadū se apne hoñToñ ko jo angāra kartī hai

nazar na lag jaa.e maañ ko vo tab sundar ho jaatī hai

jab bhī vo apne bachchoñ kī nazar utārā kartī hai

in chaTTānī rātoñ ko ik raushan tiilī toḌegī

barsoñ se ik sub.h hamārā naam pukārā kartī hai

jhil ka darpan roz laja kar bel nihaara karti hai

phir chupke se lipaT peD se zulf sanwara karti hai

bachchon ke kanchon ki gunjen zara dhyan se sun lena

mandir ki ghanTi un ki hi naql utara karti hai

phal de de kar KHush ho lena junun purana peDon ka

par duniya har pagal ko patthar hi mara karti hai

laDki hai ya jadu-garni wo hum murakh kya jaanen

jadu se apne honTon ko jo angara karti hai

nazar na lag jae man ko wo tab sundar ho jati hai

jab bhi wo apne bachchon ki nazar utara karti hai

in chaTTani raaton ko ek raushan tili toDegi

barson se ek subh hamara nam pukara karti hai