jhijak izhaar-e-arman ki ba-asani nahin jati

jhijak iz.hār-e-armāñ kī ba-āsānī nahīñ jaatī

ḳhud apne shauq kī dil se pashemānī nahīñ jaatī

taḌap shīshe ke TukḌe bhī uḌā lete haiñ hiire kī

mohabbat kī nazar jaldī se pahchānī nahīñ jaatī

ufuq par nuur rah jaatā hai sūraj Dūbne par bhī

ki dil bujh kar bhī nazroñ kī daraḳhshānī nahīñ jaatī

sū-e-dil aa ke ab chashm-e-karam bhī kyā banā legī

shuā-e-mehr se sahrā kī vīrānī nahīñ jaatī

ye bazm-e-dair-o-kāba hai nahīñ kuchh sehn-e-mai-ḳhāna

zarā āvāz gūñjī aur pahchānī nahīñ jaatī

kisī ke lutf-e-be-pāyāñ ne kuchh yuuñ sū-e-dil dekhā

ki ab nā-karda jurmoñ kī pashemānī nahīñ jaatī

taġhāful par na jā us ke taġhāful ek dhokā hai

nigāh-e-dost kī tahrīk-e-pinhānī nahīñ jaatī

nazar jhūTī shabāb andhā vo husn ik naqsh-e-fānī hai

haqīqat hai to ho lekin abhī maanī nahīñ jaatī

mayassar hai har ik īmāñ meñ mujh ko zauq kā sajda

koī maz.hab bhī ho buniyād-e-insānī nahīñ jaatī

nazar jis kī taraf kar ke nigāheñ pher lete ho

qayāmat tak phir us dil kī pareshānī nahīñ jaatī

na samjho zabt-e-girya se ḳhatā par maiñ nahīñ nādim

ki aañsū poñchh lene se pashemānī nahīñ jaatī

na poñchho tajrabāt-e-zindagānī choT lagtī hai

nazar ab dost aur dushman kī pahchānī nahīñ jaatī

zamāna karvaToñ par karvaTeñ letā hai aur 'mullā'

tirī ab tak vo ḳhvāb-āvar ġhazal-ḳhvānī nahīñ jaatī

jhijak izhaar-e-arman ki ba-asani nahin jati

KHud apne shauq ki dil se pashemani nahin jati

taDap shishe ke TukDe bhi uDa lete hain hire ki

mohabbat ki nazar jaldi se pahchani nahin jati

ufuq par nur rah jata hai suraj Dubne par bhi

ki dil bujh kar bhi nazron ki daraKHshani nahin jati

su-e-dil aa ke ab chashm-e-karam bhi kya bana legi

shua-e-mehr se sahra ki virani nahin jati

ye bazm-e-dair-o-kaba hai nahin kuchh sehn-e-mai-KHana

zara aawaz gunji aur pahchani nahin jati

kisi ke lutf-e-be-payan ne kuchh yun su-e-dil dekha

ki ab na-karda jurmon ki pashemani nahin jati

taghaful par na ja us ke taghaful ek dhoka hai

nigah-e-dost ki tahrik-e-pinhani nahin jati

nazar jhuTi shabab andha wo husn ek naqsh-e-fani hai

haqiqat hai to ho lekin abhi mani nahin jati

mayassar hai har ek iman mein mujh ko zauq ka sajda

koi mazhab bhi ho buniyaad-e-insani nahin jati

nazar jis ki taraf kar ke nigahen pher lete ho

qayamat tak phir us dil ki pareshani nahin jati

na samjho zabt-e-girya se KHata par main nahin nadim

ki aansu ponchh lene se pashemani nahin jati

na ponchho tajrabaat-e-zindagani choT lagti hai

nazar ab dost aur dushman ki pahchani nahin jati

zamana karwaTon par karwaTen leta hai aur 'mulla'

teri ab tak wo KHwab-awar ghazal-KHwani nahin jati