jhilmil se kya rabt nikalen kashti ki taqdiron ka

jhilmil se kyā rabt nikāleñ kashtī kī taqdīroñ kā

taare kashf nahīñ kar sakte be-āvāz jazīroñ kā

har nākāmī ne aise bhī kuchh dīvāreñ khīñchī haiñ

ik be-naqsha shahr banā hai lā-hāsil tadbīroñ kā

ik muddat se qarya-e-jāñ meñ jhaḌte haiñ jhankār ke phuul

jaise mere jism ke andar mausam ho zanjīroñ kā

duur se jhunD parindoñ kā lagte haiñ ḳheme vāloñ ko

kis andāz kā aanā hai ye aag chhiḌakte tīroñ kā

raat ga.e jab taare bhī kuchh be-ma.anī se lagte haiñ

ek dabistāñ khultā hai un āñkhoñ kī tafsīroñ kā

ek hathelī par us ne mahkā.e hinā kī sundar phuul

ek hathelī kī qismat meñ likkhā dasht lakīroñ kā

jhilmil se kya rabt nikalen kashti ki taqdiron ka

tare kashf nahin kar sakte be-awaz jaziron ka

har nakaami ne aise bhi kuchh diwaren khinchi hain

ek be-naqsha shahr bana hai la-hasil tadbiron ka

ek muddat se qarya-e-jaan mein jhaDte hain jhankar ke phul

jaise mere jism ke andar mausam ho zanjiron ka

dur se jhunD parindon ka lagte hain KHeme walon ko

kis andaz ka aana hai ye aag chhiDakte tiron ka

raat gae jab tare bhi kuchh be-mani se lagte hain

ek dabistan khulta hai un aankhon ki tafsiron ka

ek hatheli par us ne mahkae hina ki sundar phul

ek hatheli ki qismat mein likkha dasht lakiron ka