jhilmilate hue aankhon mein sitare lamhe

jhilmilāte hue āñkhoñ meñ sitāre lamhe

mujh pe qudrat ne kuchh aise bhī utāre lamhe

bhuul jaanā tujhe mumkin to nahīñ hai lekin

jā tujhe baḳhsh diye saath guzāre lamhe

ek nuqte meñ simaT kar chale aa.e haiñ sabhī

dāstānoñ meñ the phaile hue saare lamhe

haa.e kyā din the jinheñ soch ke jī uThte haiñ

soñdhī miTTī kī tarah kore kuñvāre lamhe

aaj bhī vaj.h-e-siyādat haiñ mire vāste vo

terī qurbat ne jo do-chār sañvāre lamhe

jaise ilhām kī sūrat vo utarne lag jaa.eñ

mere hī dil pe 'qamar' sab thake haare lamhe

jhilmilate hue aankhon mein sitare lamhe

mujh pe qudrat ne kuchh aise bhi utare lamhe

bhul jaana tujhe mumkin to nahin hai lekin

ja tujhe baKHsh diye sath guzare lamhe

ek nuqte mein simaT kar chale aae hain sabhi

dastanon mein the phaile hue sare lamhe

hae kya din the jinhen soch ke ji uThte hain

sondhi miTTi ki tarah kore kunware lamhe

aaj bhi wajh-e-siyaadat hain mere waste wo

teri qurbat ne jo do-chaar sanware lamhe

jaise ilham ki surat wo utarne lag jaen

mere hi dil pe 'qamar' sab thake haare lamhe