jhilmilate hue din-raat hamare le kar

jhilmilāte hue din-rāt hamāre le kar

kaun aayā hai hathelī pe sitāre le kar

ham use āñkhoñ kī dehrī nahīñ chaḌhne dete

niiñd aatī na agar ḳhvāb tumhāre le kar

raat laa.ī hai sitāroñ se sajī qindīleñ

sar-nigūñ din hai dhanak vaale nazāre le kar

ek ummīd baḌī duur talak jaatī hai

terī āvāz ke ḳhāmosh ishāre le kar

raat shabnam se bhigo detī hai chehrā chehrā

din chalā aatā hai āñkhoñ meñ sharāre le kar

ek din us ne mujhe paak nazar se chūmā

umr-bhar chalnā paḌā mujh ko sahāre le kar

jhilmilate hue din-raat hamare le kar

kaun aaya hai hatheli pe sitare le kar

hum use aankhon ki dehri nahin chaDhne dete

nind aati na agar KHwab tumhaare le kar

raat lai hai sitaron se saji qindilen

sar-nigun din hai dhanak wale nazare le kar

ek ummid baDi dur talak jati hai

teri aawaz ke KHamosh ishaare le kar

raat shabnam se bhigo deti hai chehra chehra

din chala aata hai aankhon mein sharare le kar

ek din us ne mujhe pak nazar se chuma

umr-bhar chalna paDa mujh ko sahaare le kar