jhuk gaya pa-e-jaanan pe sar hi to hai

jhuk gayā pā-e-jānāñ pe sar hī to hai

kho ga.ī bijliyoñ meñ nazar hī to hai

ye jahāñ pattharoñ kā nagar hī to hai

saañs lenā yahāñ ik hunar hī to hai

chain se rahne detā nahīñ ek jā

ye hamārā junūn-e-safar hī to hai

rāhzan hī sahī rāh-e-manzil meñ vo

sochtā huuñ mirā ham-safar hī to hai

tum to dāman bachāte ho ab is tarah

jaise aañsū nahīñ ye sharar hī to hai

chalte rahiye jahāñ tak mile raushnī

zindagī husn kī rahguzar hī to hai

tīrgī hī ko 'nāzim' lagāo gale

ye bhī ta.abīr-e-ḳhvāb-e-sahar hī to hai

jhuk gaya pa-e-jaanan pe sar hi to hai

kho gai bijliyon mein nazar hi to hai

ye jahan pattharon ka nagar hi to hai

sans lena yahan ek hunar hi to hai

chain se rahne deta nahin ek ja

ye hamara junun-e-safar hi to hai

rahzan hi sahi rah-e-manzil mein wo

sochta hun mera ham-safar hi to hai

tum to daman bachate ho ab is tarah

jaise aansu nahin ye sharar hi to hai

chalte rahiye jahan tak mile raushni

zindagi husn ki rahguzar hi to hai

tirgi hi ko 'nazim' lagao gale

ye bhi tabir-e-KHwab-e-sahar hi to hai