jhuka sake na mujhe hadse mohabbat ke

jhukā sake na mujhe hādse mohabbat ke

vahī huuñ maiñ to vahī silsile mohabbat ke

ye aur baat ki tum hī ne imtihāñ na liyā

sabaq to yaad the saare mujhe mohabbat ke

talāsh kar unheñ ahrām-e-misr kī sūrat

haiñ dasht-e-dil meñ ka.ī maqbare mohabbat ke

batā.ūñ maiñ tujhe anjām-e-ārzū kaise

banā rahā huuñ abhī zā.iche mohabbat ke

havā ye kaisī chalī hai sar-e-dayār-e-vafā

bujhe bujhe haiñ diloñ meñ diye mohabbat ke

na jaane kaise marāhil haiñ us jagah darpesh

ruke hue haiñ jahāñ qāfile mohabbat ke

rah-e-vafā meñ qadam dekh bhaal kar rakhnā

kuchh itne sahl nahīñ rāste mohabbat ke

kashākash-e-ġhame-duniyā se kis ko fursat hai

karūñ maiñ kis se yahāñ mashvare mohabbat ke

zarā sā bhī mujhe ḳhauf-e-ḳhizāñ nahīñ 'shāhid'

mahak rahe haiñ abhī gul-kade mohabbat ke

jhuka sake na mujhe hadse mohabbat ke

wahi hun main to wahi silsile mohabbat ke

ye aur baat ki tum hi ne imtihan na liya

sabaq to yaad the sare mujhe mohabbat ke

talash kar unhen ahram-e-misr ki surat

hain dasht-e-dil mein kai maqbare mohabbat ke

bataun main tujhe anjam-e-arzu kaise

bana raha hun abhi zaiche mohabbat ke

hawa ye kaisi chali hai sar-e-dayar-e-wafa

bujhe bujhe hain dilon mein diye mohabbat ke

na jaane kaise marahil hain us jagah darpesh

ruke hue hain jahan qafile mohabbat ke

rah-e-wafa mein qadam dekh bhaal kar rakhna

kuchh itne sahl nahin raste mohabbat ke

kashakash-e-ghame-duniya se kis ko fursat hai

karun main kis se yahan mashware mohabbat ke

zara sa bhi mujhe KHauf-e-KHizan nahin 'shahid'

mahak rahe hain abhi gul-kade mohabbat ke