jhuke hue peDon ke tanon par chhap hai chanchal dhaare ki

jhuke hue peḌoñ ke tanoñ par chhāp hai chanchal dhāre kī

haule haule Dol rahī hai ghaas nadī ke kināre kī

kasī huī mirdañg sā paanī havā kī thaap se bajtā hai

lahar tarañg se uThtī hai jhankār kisī ektāre kī

khulī fazā meñ nikle to zañg-e-yaksānī duur huā

ek havā ke jhoñke ne rañgat badlī añgāre kī

abr kī tah meñ bijlī chamkī us kā tabassum thā magar aur

lafzoñ meñ pahchān na paa.e thī jo baat ishāre kī

dekh rahā huuñ band ḳhudā kī muTThī hone vaalī hai

sub.h ke motī par ab bhī hai dhīmī aañch sitāre kī

saḳht chaTāneñ shīsha paanī gul-būTe sab zaa.e.a the

sañg-o-shajar ko ma.anī de ga.ī taan kisī banjāre kī

jhuke hue peDon ke tanon par chhap hai chanchal dhaare ki

haule haule Dol rahi hai ghas nadi ke kinare ki

kasi hui mirdang sa pani hawa ki thap se bajta hai

lahar tarang se uThti hai jhankar kisi ektare ki

khuli faza mein nikle to zang-e-yaksani dur hua

ek hawa ke jhonke ne rangat badli angare ki

abr ki tah mein bijli chamki us ka tabassum tha magar aur

lafzon mein pahchan na pae thi jo baat ishaare ki

dekh raha hun band KHuda ki muTThi hone wali hai

subh ke moti par ab bhi hai dhimi aanch sitare ki

saKHt chaTanen shisha pani gul-buTe sab zaea the

sang-o-shajar ko mani de gai tan kisi banjare ki