جھکنا پڑتا ہے وہ غصہ سے جو تن جاتے ہیں

جھکنا پڑتا ہے وہ غصہ سے جو تن جاتے ہیں

آپ ہم روٹھتے ہیں آپ ہی من جاتے ہیں

ہوں خوشامد کی جو باتیں تو وہ من جاتے ہیں

کام بگڑے ہوئے باتوں ہی میں بن جاتے ہیں

خوب نبھتی ہے کہ جب کچھ نہ رہے بات کا پاس

جس طرح طبع ہو ہم ویسے ہی بن جاتے ہیں

میری ہمدردی ہے بلبل کو بچانا یا رب

دام صیاد لئے سوئے چمن جاتے ہیں

تم رہو غیروں میں اب شرم رکھو یا نہ رکھو

ہم ہی اس بزم سے اے عہد شکن جاتے ہیں

تھے ابھی تو وہ یہاں کہتے ہیں اور ڈھونڈھتے ہیں

خواب ہم دیکھ کے دیوانے سے بن جاتے ہیں

اس طرح پھرتی ہیں نظریں تری ہم سے بے دید

چوکڑی بھرتے ہوئے جیسے ہرن جاتے ہیں

ان سے مطلب نکل آتے ہیں سب آسانی سے

خوب لڑ بھڑ کے جو آپس میں وہ چھن جاتے ہیں

ہم گڑے جاتے ہیں کیا کیا نہ حیا سے دل میں

دینے جب غیر کو وہ گور و کفن جاتے ہیں

کیوں کسی اور کا غصہ وہ اتاریں ہم پر

بیچ میں بول کے ہم مفت میں سن جاتے ہیں

جب بہار آئی وہی دشت وہی تم صابرؔ

آپ دیوانے ہیں جو سوئے وطن جاتے ہیں