jhukna paDta hai wo ghusse se jo tan jate hain

jhuknā paḌtā hai vo ġhusse se jo tan jaate haiñ

aap ham rūThte haiñ aap hī man jaate haiñ

hoñ ḳhushāmad kī jo bāteñ to vo man jaate haiñ

kaam bigḌe hue bātoñ hī meñ ban jaate haiñ

ḳhuub nibhtī hai ki jab kuchh na rahe baat kā paas

jis tarah tab.a ho ham vaise hī ban jaate haiñ

merī hamdardī hai bulbul ko bachānā yā-rab

dām-e-sayyād liye sū-e-chaman jaate haiñ

tum raho ġhairoñ meñ ab sharm rakho yā na rakho

ham hī is bazm se ai ahd-shikan jaate haiñ

the abhī to vo yahāñ kahte haiñ aur DhūñDhte haiñ

ḳhvāb ham dekh ke dīvāne se ban jaate haiñ

is tarah phirtī haiñ nazreñ tirī ham se be-dīd

chaukḌī bharte hue jaise hiran jaate haiñ

un se matlab nikal aate haiñ sab āsānī se

ḳhuub laḌ-bhiḌ ke jo aapas meñ vo chhan jaate haiñ

ham gaḌe jaate haiñ kyā kyā na hayā se dil meñ

dene jab ġhair ko vo gor-o-kafan jaate haiñ

kyoñ kisī aur kā ġhussa vo utāreñ ham par

biich meñ bol ke ham muft meñ san jaate haiñ

jab bahār aa.ī vahī dasht vahī tum 'sābir'

aap dīvāne haiñ jo sū-e-vatan jaate haiñ

jhukna paDta hai wo ghusse se jo tan jate hain

aap hum ruThte hain aap hi man jate hain

hon KHushamad ki jo baaten to wo man jate hain

kaam bigDe hue baaton hi mein ban jate hain

KHub nibhti hai ki jab kuchh na rahe baat ka pas

jis tarah taba ho hum waise hi ban jate hain

meri hamdardi hai bulbul ko bachana ya-rab

dam-e-sayyaad liye su-e-chaman jate hain

tum raho ghairon mein ab sharm rakho ya na rakho

hum hi is bazm se ai ahd-shikan jate hain

the abhi to wo yahan kahte hain aur DhunDhte hain

KHwab hum dekh ke diwane se ban jate hain

is tarah phirti hain nazren teri hum se be-did

chaukDi bharte hue jaise hiran jate hain

un se matlab nikal aate hain sab aasani se

KHub laD-bhiD ke jo aapas mein wo chhan jate hain

hum gaDe jate hain kya kya na haya se dil mein

dene jab ghair ko wo gor-o-kafan jate hain

kyon kisi aur ka ghussa wo utaren hum par

bich mein bol ke hum muft mein san jate hain

jab bahaar aai wahi dasht wahi tum 'sabir'

aap diwane hain jo su-e-watan jate hain