jhulasti dhup mein ThanDi hawa ka jhonka bhej

jhulastī dhuup meñ ThanDī havā kā jhoñkā bhej

chaman se jānib-e-sahrā bhī koī tohfa bhej

mujhe taġhayyur-e-mausam kā kuchh yaqīn dilā

agar tasalsul-e-bārāñ nahīñ to qatra bhej

bahut dinoñ se mujhe tere ḳhvāb aate haiñ

koī payām koī ḳhair kā sandesa bhej

kabhī mirī bhī samā.at pe koī naġhma likh

mire bhī ghar ke shajar par koī parinda bhej

hamāre sahn meñ shāḳhoñ ke haath ḳhālī haiñ

bahār un ke liye motiye kā gajrā bhej

ḳhalā ke gumbad-e-be-dar meñ koī rauzan kar

ḳhudā-e-nūr falak par koī sitāra bhej

har ik faqīr pe bāb-e-karam nahīñ khultā

'ra.ūf' amiir dar-e-nīm-vā se kaasa bhej

jhulasti dhup mein ThanDi hawa ka jhonka bhej

chaman se jaanib-e-sahra bhi koi tohfa bhej

mujhe taghayyur-e-mausam ka kuchh yaqin dila

agar tasalsul-e-baran nahin to qatra bhej

bahut dinon se mujhe tere KHwab aate hain

koi payam koi KHair ka sandesa bhej

kabhi meri bhi samaat pe koi naghma likh

mere bhi ghar ke shajar par koi parinda bhej

hamare sahn mein shaKHon ke hath KHali hain

bahaar un ke liye motiye ka gajra bhej

KHala ke gumbad-e-be-dar mein koi rauzan kar

KHuda-e-nur falak par koi sitara bhej

har ek faqir pe bab-e-karam nahin khulta

'rauf' amir dar-e-nim-wa se kasa bhej