jhuT kahte hain ki aawaz laga sakta hai

jhuuT kahte haiñ ki āvāz lagā saktā hai

Dūbne vaalā faqat haath hilā saktā hai

aur phir chhoḌ gayā vo jo kahā kartā thā

kaun bad-baḳht tujhe chhoḌ ke jā saktā hai

rāsta bhūlnā 'ādat hai purānī us kī

yā'nī ik roz vo ghar bhuul ke aa saktā hai

shart itnī hai ki tū us meñ faqat merā ho

phir to ik ḳhvāb ka.ī baar dikhā saktā hai

aañkh buntī hai kisī ḳhvāb kā tānā-bānā

ḳhvāb bhī vo jo mirī niiñd uḌā saktā hai

us ne kyā soch ke sauñpā hai kahānī meñ mujhe

aisā kirdār jo parde bhī girā saktā hai

mere razzāq se kartī hai mirī bhuuk savāl

kyā yahīñ rizq ke vā'de ko nibhā saktā hai

tum na mānoge magar mere chale jaane par

ik na ik roz tumheñ sabr bhī aa saktā hai

jhuT kahte hain ki aawaz laga sakta hai

Dubne wala faqat hath hila sakta hai

aur phir chhoD gaya wo jo kaha karta tha

kaun bad-baKHt tujhe chhoD ke ja sakta hai

rasta bhulna 'adat hai purani us ki

ya'ni ek roz wo ghar bhul ke aa sakta hai

shart itni hai ki tu us mein faqat mera ho

phir to ek KHwab kai bar dikha sakta hai

aankh bunti hai kisi KHwab ka tana-bana

KHwab bhi wo jo meri nind uDa sakta hai

us ne kya soch ke saunpa hai kahani mein mujhe

aisa kirdar jo parde bhi gira sakta hai

mere razzaq se karti hai meri bhuk sawal

kya yahin rizq ke wa'de ko nibha sakta hai

tum na manoge magar mere chale jaane par

ek na ek roz tumhein sabr bhi aa sakta hai