jhuTi tasalliyon pe shab-e-gham basar hui

jhūTī tasalliyoñ pe shab-e-ġham basar huī

uThī chamak jo zaḳhm meñ samjhā sahar huī

har har nafas chhurī hai liye qat-e-shām-e-hijr

yā aaj dam nikal hī gayā yā sahar huī

badlīñ jo karvaTeñ to zamāna badal gayā

duniyā thī be-sabāt idhar kī udhar huī

jaatī hai raushnī mirī āñkhoñ ko chhoḌ ke

taare chhupe vo so ke uThe vo sahar huī

pahle ye jāntā thā ki zaḳhmī nahīñ hai dil

jab de diyā ragoñ ne lahū jab ḳhabar huī

kis muñh se ro.uuñ maiñ dil-e-hasrat-nasīb ko

jab mar gayā ġharīb to mujh ko ḳhabar huī

'jāved' bū-e-gul ko havā aa ke le ga.ī

kaliyoñ ko ġham huā na guloñ ko ḳhabar huī

jhuTi tasalliyon pe shab-e-gham basar hui

uThi chamak jo zaKHm mein samjha sahar hui

har har nafas chhuri hai liye qat-e-sham-e-hijr

ya aaj dam nikal hi gaya ya sahar hui

badlin jo karwaTen to zamana badal gaya

duniya thi be-sabaat idhar ki udhar hui

jati hai raushni meri aankhon ko chhoD ke

tare chhupe wo so ke uThe wo sahar hui

pahle ye jaanta tha ki zaKHmi nahin hai dil

jab de diya ragon ne lahu jab KHabar hui

kis munh se roun main dil-e-hasrat-nasib ko

jab mar gaya gharib to mujh ko KHabar hui

'jawed' bu-e-gul ko hawa aa ke le gai

kaliyon ko gham hua na gulon ko KHabar hui