jidhar se tir chala koi mehrban nikla

jidhar se tiir chalā koī mehrbāñ niklā

tavaqquāt se baḌh kar vo mezbāñ niklā

samar se pahle shajar kaaT kar jalā Daale

ki jald-bāz bahut ab ke bāġhbāñ niklā

ajiib rañg huā ab ke merī nagrī kā

ki jo bhī shahr meñ niklā vo be-amāñ niklā

ye kis azaab ne bastī ko merī gher liyā

ki chūlhe sard rahe yaañ magar dhuāñ niklā

savāl ye hai sabab kis se qatl kā pūchheñ

ki jis ne qatl kiyā vo hī be-zabāñ niklā

hamāre baad bhī kyā zeb-e-dār hogā koī

yahī savāl mirā zeb-e-dāstāñ niklā

ham apnī aql ko ilzām deñ ki qismat ko

hamāre daur meñ rahzan bhī pāsbāñ niklā

jabīñ jhukī to zamīñ uTh ke ājizī se milī

jo sar uThā to bahut duur āsmāñ niklā

rahe haiñ ham to 'karāmat' ga.e dinoñ ke naqīb

ki ham se ahd nayā saḳht bad-gumāñ niklā

jidhar se tir chala koi mehrban nikla

tawaqquat se baDh kar wo mezban nikla

samar se pahle shajar kaT kar jala Dale

ki jald-baz bahut ab ke baghban nikla

ajib rang hua ab ke meri nagri ka

ki jo bhi shahr mein nikla wo be-aman nikla

ye kis azab ne basti ko meri gher liya

ki chulhe sard rahe yan magar dhuan nikla

sawal ye hai sabab kis se qatl ka puchhen

ki jis ne qatl kiya wo hi be-zaban nikla

hamare baad bhi kya zeb-e-dar hoga koi

yahi sawal mera zeb-e-dastan nikla

hum apni aql ko ilzam den ki qismat ko

hamare daur mein rahzan bhi pasban nikla

jabin jhuki to zamin uTh ke aajizi se mili

jo sar uTha to bahut dur aasman nikla

rahe hain hum to 'karamat' gae dinon ke naqib

ki hum se ahd naya saKHt bad-guman nikla