jigar-e-soKHta hain aur dil-e-biryan hain hum

jigar-e-soḳhta haiñ aur dil-e-biryāñ haiñ ham

sho.ale kī tarah sadā dīda-e-giryāñ haiñ ham

muttasil laḳht-e-jigar karte haiñ āñkhoñ se sadā

aah kis āshiq-e-ġham-dīda kī mizhgāñ haiñ ham

kabhī hañste haiñ kabhī rote haiñ jalte haiñ kabhī

gul haiñ shabnam haiñ ki yā ātish-e-sozāñ haiñ ham

ham meñ hī ālam-e-akbar hue go jurm-e-saġhīr

maz.har-e-jalva-e-haq hazrat-e-insāñ haiñ ham

dahr pur-shor hai hāthoñ se hamāre ai aah

āfrīnash meñ magar nāla-o-afġhāñ haiñ ham

fikr-e-jam.iyyat-e-dil ham ko kahāñ aah 'hasan'

ḳhātir-āshufta-e-gesū-e-pareshāñ haiñ ham

jigar-e-soKHta hain aur dil-e-biryan hain hum

shoale ki tarah sada dida-e-giryan hain hum

muttasil laKHt-e-jigar karte hain aankhon se sada

aah kis aashiq-e-gham-dida ki mizhgan hain hum

kabhi hanste hain kabhi rote hain jalte hain kabhi

gul hain shabnam hain ki ya aatish-e-sozan hain hum

hum mein hi aalam-e-akbar hue go jurm-e-saghir

mazhar-e-jalwa-e-haq hazrat-e-insan hain hum

dahr pur-shor hai hathon se hamare ai aah

aafrinash mein magar nala-o-afghan hain hum

fikr-e-jamiyyat-e-dil hum ko kahan aah 'hasan'

KHatir-ashufta-e-gesu-e-pareshan hain hum