jigar-gudaz maani samajh sako to kahun

jigar-gudāz ma.ānī samajh sako to kahūñ

qazā-o-qadr-e-zamānī samajh sako to kahūñ

vajūd ā.ina-ḳhānoñ kā hai fanā-anjām

qazā-e-charḳh-e-dokhānī samajh sako to kahūñ

jabīn-e-vaqt kī tahrīr meñ nihāñ kyā hai

ḳhirad kī zahr-fishānī samajh sako to kahūñ

qazā kī god meñ hai hasratoñ kā gahvāra

zabān-e-ramz-e-nihānī samajh sako to kahūñ

bashar ke dīda-e-dil par hijāb-e-ġhaflat hai

fareb-e-husn-o-javānī samajh sako to kahūñ

jahāz-e-umr na jaane ruke kahāñ jā kar

muhīt-e-dil kī ravānī samajh sako to kahūñ

ḳhudā ke ba.ad bashar kā maqām azmat hai

tum apnī kuchh bhī kahānī samajh sako to kahūñ

ḳhizāñ-badosh chaman meñ bahār aa.ī hai

nizām-e-ālam-e-fānī samajh sako to kahūñ

vo harf-e-rāz jo lab tak kisī ke aa na sakā

hakīm-e-rāz kī baanī samajh sako to kahūñ

hayāt-e-chand-nafas par tafāḳhur-e-be-jā

har ek chiiz hai faanī samajh sako to kahūñ

muqāmirān-e-bisāt-e-havas agar tum kuchh

hadīs-faqr zabānī samajh sako to kahūñ

safīna aql kā 'bebāk' ġharq hai mutlaq

hai kitnā zarf meñ paanī samajh sako to kahūñ

jigar-gudaz maani samajh sako to kahun

qaza-o-qadr-e-zamani samajh sako to kahun

wajud aaina-KHanon ka hai fana-anjam

qaza-e-charKH-e-dokhani samajh sako to kahun

jabin-e-waqt ki tahrir mein nihan kya hai

KHirad ki zahr-fishani samajh sako to kahun

qaza ki god mein hai hasraton ka gahwara

zaban-e-ramz-e-nihani samajh sako to kahun

bashar ke dida-e-dil par hijab-e-ghaflat hai

fareb-e-husn-o-jawani samajh sako to kahun

jahaz-e-umr na jaane ruke kahan ja kar

muhit-e-dil ki rawani samajh sako to kahun

KHuda ke baad bashar ka maqam azmat hai

tum apni kuchh bhi kahani samajh sako to kahun

KHizan-badosh chaman mein bahaar aai hai

nizam-e-alam-e-fani samajh sako to kahun

wo harf-e-raaz jo lab tak kisi ke aa na saka

hakim-e-raaz ki bani samajh sako to kahun

hayat-e-chand-nafas par tafaKHur-e-be-ja

har ek chiz hai fani samajh sako to kahun

muqamiran-e-bisat-e-hawas agar tum kuchh

hadis-faqr zabani samajh sako to kahun

safina aql ka 'bebak' gharq hai mutlaq

hai kitna zarf mein pani samajh sako to kahun