جگر کا کرب نظر کی جلن چھپاتا ہوا

جگر کا کرب نظر کی جلن چھپاتا ہوا

میں جب بھی اس سے ملا ہوں تو مسکراتا ہوا

سمندروں کی تہوں سے کبھی افق سے پرے

میں ہر دیار سے گزرا ہوں گنگناتا ہوا

عجیب شہر ہے یہ شہر عمر بھی جس میں

ہر ایک لمحہ ملا آئنہ دکھاتا ہوا

میں حاسدوں کے دلوں میں ہمیشہ ہوں محفوظ

اندھیری قبروں میں رہتا ہوں جگمگاتا ہوا

مرے لئے تو عروج و زوال یکساں ہیں

نہ کوئی آتا ہوا ہے نہ کوئی جاتا ہوا

زمانے بھر کی بلندی ہے میرے قدموں میں

میں وہ فقیر کہ چلتا ہوں سر جھکاتا ہوا

عجیب شخص ہے یہ اخترؔ پریشاں بھی

ہر ایک حال میں رہتا ہے مسکراتا ہوا