jigar ka karb nazar ki jalan chhupata hua

jigar kā karb nazar kī jalan chhupātā huā

maiñ jab bhī us se milā huuñ to muskurātā huā

samundaroñ kī tahoñ se kabhī ufuq se pare

maiñ har dayār se guzrā huuñ gungunātā huā

'ajīb shahr hai ye shahr-e-umr bhī jis meñ

har ek lamha milā aa.ina dikhātā huā

maiñ hāsidoñ ke diloñ meñ hamesha huuñ mahfūz

añdherī qabroñ meñ rahtā huuñ jagmagātā huā

mire liye to urūj-o-zavāl yaksāñ haiñ

na koī aatā huā hai na koī jaatā huā

zamāne bhar kī bulandī hai mere qadmoñ meñ

maiñ vo faqīr ki chaltā huuñ sar jhukātā huā

'ajīb shaḳhs hai ye 'aḳhtar'-e-pareshāñ bhī

har ek haal meñ rahtā hai muskurātā huā

jigar ka karb nazar ki jalan chhupata hua

main jab bhi us se mila hun to muskuraata hua

samundaron ki tahon se kabhi ufuq se pare

main har dayar se guzra hun gungunata hua

'ajib shahr hai ye shahr-e-umr bhi jis mein

har ek lamha mila aaina dikhata hua

main hasidon ke dilon mein hamesha hun mahfuz

andheri qabron mein rahta hun jagmagata hua

mere liye to uruj-o-zawal yaksan hain

na koi aata hua hai na koi jata hua

zamane bhar ki bulandi hai mere qadmon mein

main wo faqir ki chalta hun sar jhukata hua

'ajib shaKHs hai ye 'aKHtar'-e-pareshan bhi

har ek haal mein rahta hai muskuraata hua