jigar ka KHun aansu mein agar shamil nahin hoga

jigar kā ḳhuun aañsū meñ agar shāmil nahīñ hogā

ye motī armuġhān-e-dost ke qābil nahīñ hogā

hasīñ ḳhvāboñ kī duniyā muztarib jazbāt kī bastī

tumheñ kyūñkar yaqīn aaya ye merā dil nahīñ hogā

shikasta saaz hai TuuTā huā sāġhar hai dil merā

mirā dil bā.is-e-rangīnī-e-mahfil nahīñ hogā

tumhārā sang-e-dar merī jabīn-e-shauq kyā kahiye

ye sang-e-dar harīf-e-sajda-e-sā.il nahīñ hogā

mujhī se zid hai daur-e-āsmāñ aur daur-e-sāġhar ko

mujhe kyoñ mudda.ā-e-zindagī hāsil nahīñ hogā

mirī kashtī huī hai jā ke āsūda jahāñ 'fitrat'

fanā kī mauj hogī dekhnā sāhil nahīñ hogā

jigar ka KHun aansu mein agar shamil nahin hoga

ye moti armughan-e-dost ke qabil nahin hoga

hasin KHwabon ki duniya muztarib jazbaat ki basti

tumhein kyunkar yaqin aaya ye mera dil nahin hoga

shikasta saz hai TuTa hua saghar hai dil mera

mera dil bais-e-rangini-e-mahfil nahin hoga

tumhaara sang-e-dar meri jabin-e-shauq kya kahiye

ye sang-e-dar harif-e-sajda-e-sail nahin hoga

mujhi se zid hai daur-e-asman aur daur-e-saghar ko

mujhe kyon muddaa-e-zindagi hasil nahin hoga

meri kashti hui hai ja ke aasuda jahan 'fitrat'

fana ki mauj hogi dekhna sahil nahin hoga