jigar ke KHun se raushan go ye charagh raha

jigar ke ḳhuun se raushan go ye charāġh rahā

misāl-e-māh chamaktā to dil kā daaġh rahā

badal gayā hai zamāna chalī vo bād-e-sumūm

na gul rahe na vo bulbul rahī na baaġh rahā

huzūr-e-husn se ḳhushiyāñ na mil sakīñ na sahī

matā-e-ġham se to sad shukr bā-farāġh rahā

vo Daal dī ġhalat andāz ik nazar tū ne

ki maiñ zamīñ pe rahā arsh par dimāġh rahā

na hogī bazm-e-jahāñ meñ rasā.ī-e-zulmat

yahāñ charāġh se jaltā agar charāġh rahā

kise thā hosh kisī kī talāsh kā 'rizvī'

tamām umr hī maiñ darpai-e-surāġh rahā

jigar ke KHun se raushan go ye charagh raha

misal-e-mah chamakta to dil ka dagh raha

badal gaya hai zamana chali wo baad-e-sumum

na gul rahe na wo bulbul rahi na bagh raha

huzur-e-husn se KHushiyan na mil sakin na sahi

mata-e-gham se to sad shukr ba-faragh raha

wo Dal di ghalat andaz ek nazar tu ne

ki main zamin pe raha arsh par dimagh raha

na hogi bazm-e-jahan mein rasai-e-zulmat

yahan charagh se jalta agar charagh raha

kise tha hosh kisi ki talash ka 'rizwi'

tamam umr hi main darpai-e-suragh raha