jigar ko dekh ke zaKHm-e-jigar ko dekhte hain

jigar ko dekh ke zaḳhm-e-jigar ko dekhte haiñ

mire aziiz mire chārāgar ko dekhte haiñ

paḌī hai sāmne jaise kisī aziiz kī laash

ham is nazar se dil-e-be-ḳhabar ko dekhte haiñ

kaTeñgī maut ke hāthoñ ye beḌiyāñ ik din

is ek aas ko aur umr bhar ko dekhte haiñ

guzar rahī hai asīrān-e-bad-nasīb kī yuuñ

kabhī qafas ko kabhī bāl-o-par ko dekhte haiñ

phir aa ke hasrateñ dam toḌtī haiñ ḳhvāb meñ kyā

udaas dil jo ham itnā sahar ko dekhte haiñ

sitam-kashoñ ko ye kyā ḳhuub chup kī daad milī

jab aañkh khultī hai turbat se ghar ko dekhte haiñ

ajal ko dekh ke sūjhā ma.aal hastī kā

sahar ko dekh ke sham-e-sahar ko dekhte haiñ

khulā hai ab ke hai hastī kā ek naam gunāh

tabāh-hālī-e-ahl-e-hunar ko dekhte haiñ

pahuñch ke manzil-e-hastī pe hosh uḌe 'beḳhud'

ki rāhzan thā jo ab rāhbar ko dekhte haiñ

jigar ko dekh ke zaKHm-e-jigar ko dekhte hain

mere aziz mere chaaragar ko dekhte hain

paDi hai samne jaise kisi aziz ki lash

hum is nazar se dil-e-be-KHabar ko dekhte hain

kaTengi maut ke hathon ye beDiyan ek din

is ek aas ko aur umr bhar ko dekhte hain

guzar rahi hai asiran-e-bad-nasib ki yun

kabhi qafas ko kabhi baal-o-par ko dekhte hain

phir aa ke hasraten dam toDti hain KHwab mein kya

udas dil jo hum itna sahar ko dekhte hain

sitam-kashon ko ye kya KHub chup ki dad mili

jab aankh khulti hai turbat se ghar ko dekhte hain

ajal ko dekh ke sujha maal hasti ka

sahar ko dekh ke sham-e-sahar ko dekhte hain

khula hai ab ke hai hasti ka ek nam gunah

tabah-haali-e-ahl-e-hunar ko dekhte hain

pahunch ke manzil-e-hasti pe hosh uDe 'beKHud'

ki rahzan tha jo ab rahbar ko dekhte hain