ji liye par man nahin bhar pae hum

jī liye par man nahīñ bhar paa.e ham

ek ḳhālī-pan nahīñ bhar paa.e ham

ḳhud se rusvā ho ga.e ham aur phir

ḳhud meñ apnā-pan nahīñ bhar paa.e ham

dil meñ jo kuchh bhī thā patthar ho gayā

āñkhoñ meñ sāvan nahīñ bhar paa.e ham

ruuh jaise saath tere chal basī

baa'd tere tan nahīñ bhar paa.e ham

pyaar karnā to sikhāyā thā use

par divāna-pan nahīñ bhar paa.e ham

ghar meñ jo būḌhā shajar thā gir gayā

phir kabhī āñgan nahīñ bhar paa.e ham

dil jo ik sadme ne be-sudh kar diyā

dil meñ phir dhaḌkan nahīñ bhar paa.e ham

ji liye par man nahin bhar pae hum

ek KHali-pan nahin bhar pae hum

KHud se ruswa ho gae hum aur phir

KHud mein apna-pan nahin bhar pae hum

dil mein jo kuchh bhi tha patthar ho gaya

aankhon mein sawan nahin bhar pae hum

ruh jaise sath tere chal basi

ba'd tere tan nahin bhar pae hum

pyar karna to sikhaya tha use

par diwana-pan nahin bhar pae hum

ghar mein jo buDha shajar tha gir gaya

phir kabhi aangan nahin bhar pae hum

dil jo ek sadme ne be-sudh kar diya

dil mein phir dhaDkan nahin bhar pae hum