ji mein aata hai ki phir mizhgan ko barham kijiye

jī meñ aatā hai ki phir mizhgāñ ko barham kījiye

kāsa-e-dil le ke phir daryūza-e-ġham kījiye

gūñjtā thā jis se koh-e-be-sutūn o dasht-e-najd

gosh-e-jāñ ko phir unhīñ nāloñ kā mahram kījiye

husn-e-be-parvā ko de kar dāvat-e-lutf-o-karam

ishq ke zer-e-nagīñ phir har do aalam kījiye

daur-e-peshīñ kī tarah phir Dāliye siine meñ zaḳhm

zaḳhm kī lazzat se phir tayyār marham kījiye

sub.h se tā shaam rahiye qissa-e-āriz meñ gum

shaam se tā sub.h zikr-e-zulf-e-barham kījiye

din ke hañgāmoñ ko kījiye dil ke sannāTe meñ ġharq

raat kī ḳhāmoshiyoñ ko vaqf-e-mātam kījiye

dā.imī ālām kā ḳhūgar banā kar ruuh ko

nā-gahānī hādsoñ kī gardaneñ ḳham kījiye

ġhaiz kī dauḌī huī hai lahar sī asnām meñ

'josh' ab ahl-e-haram se dostī kam kījiye

ji mein aata hai ki phir mizhgan ko barham kijiye

kasa-e-dil le ke phir daryuza-e-gham kijiye

gunjta tha jis se koh-e-be-sutun o dasht-e-najd

gosh-e-jaan ko phir unhin nalon ka mahram kijiye

husn-e-be-parwa ko de kar dawat-e-lutf-o-karam

ishq ke zer-e-nagin phir har do aalam kijiye

daur-e-peshin ki tarah phir Daliye sine mein zaKHm

zaKHm ki lazzat se phir tayyar marham kijiye

subh se ta sham rahiye qissa-e-ariz mein gum

sham se ta subh zikr-e-zulf-e-barham kijiye

din ke hangamon ko kijiye dil ke sannaTe mein gharq

raat ki KHamoshiyon ko waqf-e-matam kijiye

daimi aalam ka KHugar bana kar ruh ko

na-gahani hadson ki gardanen KHam kijiye

ghaiz ki dauDi hui hai lahar si asnam mein

'josh' ab ahl-e-haram se dosti kam kijiye