ji mein jab himmat na ho ji se guzar jaana bhala

jī meñ jab himmat na ho jī se guzar jaanā bhalā

har ghaḌī mar-mar ke jiine se to mar jaanā bhalā

sabr ban aa.e na jis se zahmat-e-tadbīr par

is faromāya jasārat se to Dar jaanā bhalā

husn-e-ḳhū se un ke dil meñ raah paidā kījiye

un ke dar par sar paTakne se to ghar jaanā bhalā

yaad haiñ ham ko kiye ham ne jo va.ade nafs se

aise va.ade kar ke va.adoñ se mukar jaanā bhalā

dard insāñ kā na ho dil meñ to dil ḳhuuñ kījiye

sar jhuke insāñ ke aage is se sar jaanā bhalā

shar hī kiije shar se bhī phūTe haiñ chashme ḳhair ke

kuchh na karne se yahāñ kuchh kaam kar jaanā bhalā

shāyad ai 'mohsin' hamārī hadd-e-jaulāñ hai yahī

aur kuchh baḌhne kī koshish se Thahar jaanā bhalā

ji mein jab himmat na ho ji se guzar jaana bhala

har ghaDi mar-mar ke jine se to mar jaana bhala

sabr ban aae na jis se zahmat-e-tadbir par

is faromaya jasarat se to Dar jaana bhala

husn-e-KHu se un ke dil mein rah paida kijiye

un ke dar par sar paTakne se to ghar jaana bhala

yaad hain hum ko kiye hum ne jo wade nafs se

aise wade kar ke wadon se mukar jaana bhala

dard insan ka na ho dil mein to dil KHun kijiye

sar jhuke insan ke aage is se sar jaana bhala

shar hi kije shar se bhi phuTe hain chashme KHair ke

kuchh na karne se yahan kuchh kaam kar jaana bhala

shayad ai 'mohsin' hamari hadd-e-jaulan hai yahi

aur kuchh baDhne ki koshish se Thahar jaana bhala