ji raha hun waswason ke darmiyan

jī rahā huuñ vasvasoñ ke darmiyāñ

dam-kashīda sā.atoñ ke darmiyāñ

bā-amal dekhe haiñ kitne tang-dast

be-amal in vā.izoñ ke darmiyāñ

be-samar hī ab shajar kumhlā.egā

shak ugā hai chāhatoñ ke darmiyāñ

maiñ ne hikmat se nikālā hai janāb

ek rasta rāstoñ ke darmiyāñ

mujh ko detī hai sadā.eñ rāt-din

ek vahshat sāhiloñ ke darmiyāñ

daad mere hausle kī dījiye

rah rahā huuñ kūfiyoñ ke darmiyāñ

dostoñ ke saath 'safdar' is tarah

jaise kāfir mominoñ ke darmiyāñ

ji raha hun waswason ke darmiyan

dam-kashida saaton ke darmiyan

ba-amal dekhe hain kitne tang-dast

be-amal in waizon ke darmiyan

be-samar hi ab shajar kumhlaega

shak uga hai chahaton ke darmiyan

main ne hikmat se nikala hai janab

ek rasta raston ke darmiyan

mujh ko deti hai sadaen raat-din

ek wahshat sahilon ke darmiyan

dad mere hausle ki dijiye

rah raha hun kufiyon ke darmiyan

doston ke sath 'safdar' is tarah

jaise kafir mominon ke darmiyan