جی تو ہلکا ہوا ہے رونے سے

جی تو ہلکا ہوا ہے رونے سے

پر ہے ڈرتا کسی کو کھونے سے

ہم تو بے موت مر ہی جائیں گے

تیری یادوں سے ہاتھ دھونے سے

اب بھلا دوں یہ چاہتا ہوں انہیں

خواب دیکھے تھے جو سلونے سے

سنگ دل موم ہو گیا ہے میاں

آج اک بے وفا کے رونے سے

چاہتا ہوں کے عشق پیدا ہو

بیج چاہت کا دل میں بونے سے

زندگی بھر کی اڑ گئیں نیندیں

آج اک رات بھر کے سونے سے

خوب تھے جب جدا جدا تھے ہم

کیا ملا ہم کو ایک ہونے سے

ان کی محفل پہ کیا اثر ہے نقیؔ

میرے ہونے سے یا نہ ہونے سے