جینا ہے اگر تجھ کو خوگر ہو تمنا کا

جینا ہے اگر تجھ کو خوگر ہو تمنا کا

انداز خلیلی ہے مسلک ہے یہ موسیٰ کا

بے آب تمنا دل جذبات سے عاری ہے

منظر کبھی دیکھا ہے سوکھے ہوئے دریا کا

محبوب ہے مے کش کو رندوں کی بغل میں ہے

لیکن یہ تقرب ہے بادہ ہی سے مینا کا

تھا جذب و کشش جس میں وہ شمع تجلی تھی

زائر کوئی کیوں کر ہو اب وادیٔ سینا کا

چڑھتے ہوئے سورج کے تیور کبھی دیکھے ہیں

آغاز ہے آئینہ انجام تمنا کا

اصلاح کی دنیا میں اس دل کا خدا حافظ

پیدا نہ ہوا جس میں احساس ہی توبہ کا

سیکھا ہے امیںؔ میں نے ہاتف سے غزل کہنا

یہ نغمۂ جاں پرور ہے بلبل سدرہ کا