jine aae hi muKHtasar ji len

jiine aa.e hī muḳhtasar jī leñ

ranj ho yā ḳhushī magar jī leñ

umr kuchh bhī ho zindagī kam hai

ġhair-mumkin hai umr-bhar jī leñ

chand yādeñ jo apnā hissa haiñ

un kī ḳhushiyoñ ko baañT kar jī leñ

bas isī meñ hai shaan jiine kī

apne apne maqām par jī leñ

un kī himmat hai jo qadam-ba-qadam

maut ke saath sar-basar jī leñ

baat jab hai ki yādgār bane

fā.eda kyā jo be-asar jī leñ

mausamoñ ko uThā ke kāñdhoñ par

kaash ham sūrat-e-shajar jī leñ

kaun sī raah se baḌheñ aage

kaun se moḌ par Thahar jī leñ

kaam ham ko diyā gayā hai yahī

giit gā kar nagar-nagar jī leñ

tum ki jī lo ḳhushī kī mahfil meñ

ham ki nākāmiyoñ ke ghar jī leñ

ḳhāna-e-jam to ujaḌtā hī hai

aap kitnā hī ban-sañvar jī leñ

ham isī aarzū pe marte haiñ

Daal de pyaar kī nazar jī leñ

jine aae hi muKHtasar ji len

ranj ho ya KHushi magar ji len

umr kuchh bhi ho zindagi kam hai

ghair-mumkin hai umr-bhar ji len

chand yaaden jo apna hissa hain

un ki KHushiyon ko banT kar ji len

bas isi mein hai shan jine ki

apne apne maqam par ji len

un ki himmat hai jo qadam-ba-qadam

maut ke sath sar-basar ji len

baat jab hai ki yaadgar bane

faeda kya jo be-asar ji len

mausamon ko uTha ke kandhon par

kash hum surat-e-shajar ji len

kaun si rah se baDhen aage

kaun se moD par Thahar ji len

kaam hum ko diya gaya hai yahi

git ga kar nagar-nagar ji len

tum ki ji lo KHushi ki mahfil mein

hum ki nakaamiyon ke ghar ji len

KHana-e-jam to ujaDta hi hai

aap kitna hi ban-sanwar ji len

hum isi aarzu pe marte hain

Dal de pyar ki nazar ji len