جینے آئے ہی مختصر جی لیں

جینے آئے ہی مختصر جی لیں

رنج ہو یا خوشی مگر جی لیں

عمر کچھ بھی ہو زندگی کم ہے

غیر ممکن ہے عمر بھر جی لیں

چند یادیں جو اپنا حصہ ہیں

ان کی خوشیوں کو بانٹ کر جی لیں

بس اسی میں ہے شان جینے کی

اپنے اپنے مقام پر جی لیں

ان کی ہمت ہے جو قدم بہ قدم

موت کے ساتھ سربسر جی لیں

بات جب ہے کہ یادگار بنے

فائدہ کیا جو بے اثر جی لیں

موسموں کو اٹھا کے کاندھوں پر

کاش ہم صورت شجر جی لیں

کون سی راہ سے بڑھیں آگے

کون سے موڑ پر ٹھہر جی لیں

کام ہم کو دیا گیا ہے یہی

گیت گا کر نگر نگر جی لیں

تم کہ جی لو خوشی کی محفل میں

ہم کہ ناکامیوں کے گھر جی لیں

خانۂ جم تو اجڑتا ہی ہے

آپ کتنا ہی بن سنور جی لیں

ہم اسی آرزو پہ مرتے ہیں

ڈال دے پیار کی نظر جی لیں