jine dega bhi hamein ai dil jien bhi ya na hum

jiine degā bhī hameñ ai dil ji.eñ bhī yā na ham

kyā kaheñ ab tujh ko ham tujh ko kaheñ ab kyā na ham

uTh ga.e ham darmiyāñ se uTh gayā ham se hijāb

rah ga.e ham us ke ho kar rah gayā pardā, na ham

daulat-e-dil kyā hai jā kar ahl-e-dil se pūchhiye

maal thā apnā bhī kuchh jaane magar rakhnā na ham

rañj-e-rusvā.ī nahīñ duniyā hai rusvā.ī kā ghar

haiñ sabhī rusvā to yuuñ samjho na tum rusvā na ham

fā.eda kyā rahtī duniyā tak agar koī rahā

ye to zāhir hai ki rahne ke liye duniyā na ham

khā ga.ī ahl-e-havas kī vaz.a ahl-e-ishq ko

baat kis kī rah ga.ī koī adū sachchā na ham

ḳhud-farāmoshī ne rakkhā hai giraftār-e-ḳhudī

chhūTte kyuuñ chhoḌte dāman agar apnā na ham

is se kuchh hotī agar 'nātiq' hameñ taskīn-e-tab.a

aaj tak sab jam.a kar lete kalām apnā na ham

jine dega bhi hamein ai dil jien bhi ya na hum

kya kahen ab tujh ko hum tujh ko kahen ab kya na hum

uTh gae hum darmiyan se uTh gaya hum se hijab

rah gae hum us ke ho kar rah gaya parda, na hum

daulat-e-dil kya hai ja kar ahl-e-dil se puchhiye

mal tha apna bhi kuchh jaane magar rakhna na hum

ranj-e-ruswai nahin duniya hai ruswai ka ghar

hain sabhi ruswa to yun samjho na tum ruswa na hum

faeda kya rahti duniya tak agar koi raha

ye to zahir hai ki rahne ke liye duniya na hum

kha gai ahl-e-hawas ki waza ahl-e-ishq ko

baat kis ki rah gai koi adu sachcha na hum

KHud-faramoshi ne rakkha hai giraftar-e-KHudi

chhuTte kyun chhoDte daman agar apna na hum

is se kuchh hoti agar 'natiq' hamein taskin-e-taba

aaj tak sab jama kar lete kalam apna na hum