جینے کا ارمان نہیں ہے

جینے کا ارمان نہیں ہے

مرنا بھی آسان نہیں ہے

یاد تمہاری میرے دل کی

مالک ہے مہمان نہیں ہے

کون ہے اپنا کون پرایا

دل کو ابھی پہچان نہیں ہے

الفت کرنا سہل ہے لیکن

غم کھانا آسان نہیں ہے

وہ روداد نہیں ہے میری

غم جس کا عنوان نہیں ہے

صورت سے تم حال نہ سمجھے

کہنے کا اوسان نہیں ہے

تیرے غم کی دولت پا کر

اور کوئی ارمان نہیں ہے

جان و دل یا دین و ایماں

کیا تم پر قربان نہیں ہے

دور رکھا قدموں سے شفاؔ کو

یہ تو کرم کی شان نہیں ہے