jine ka tu ne roz naya mashghala diya

jiine kā tū ne roz nayā mashġhala diyā

ik ġham haTā nahīñ ki hameñ dūsrā diyā

ye sochiye ki aap se duniyā ko kyā milā

mat sochiye ki aap ko duniyā ne kiyā diyā

har ek meñ hai pyaar kī ḳhushbū basī huī

tū ne to jo bhī zaḳhm diyā kaam kā diyā

māyūs zindagī kī thakan le ke so ga.e

uTThe to phir ḳhudā ne nayā hausla diyā

mānūs is qadar haiñ tire ġham se in dinoñ

har ik ḳhushī ko sāya-e-ġham meñ sulā diyā

ā.īna toḌ degā vo chehre ko dekh kar

mā'lūm thā to phir use kyoñ aa.ina diyā

ik shā’ir-o-adīb kī hai tum ko justujū

'āsim' kā phir batāo ye kis ne pata diyā

jine ka tu ne roz naya mashghala diya

ek gham haTa nahin ki hamein dusra diya

ye sochiye ki aap se duniya ko kya mila

mat sochiye ki aap ko duniya ne kiya diya

har ek mein hai pyar ki KHushbu basi hui

tu ne to jo bhi zaKHm diya kaam ka diya

mayus zindagi ki thakan le ke so gae

uTThe to phir KHuda ne naya hausla diya

manus is qadar hain tere gham se in dinon

har ek KHushi ko saya-e-gham mein sula diya

aaina toD dega wo chehre ko dekh kar

ma'lum tha to phir use kyon aaina diya

ek sha’ir-o-adib ki hai tum ko justuju

'asim' ka phir batao ye kis ne pata diya