جینے کا وسیلہ بھی اسباب بھی بدلیں گے

جینے کا وسیلہ بھی اسباب بھی بدلیں گے

موجوں کو تو بدلیں گے سیلاب بھی بدلیں گے

تہذیب و تمدن ہی ورثے میں ملے ہم کو

ہم تم کو تو بدلیں گے آداب بھی بدلیں گے

معیار بدل دے گا خود اپنی حقیقت یوں

حاصل جو کیے وہ سب القاب بھی بدلیں گے

احساس محبت میں یہ سوچ بھی شامل کی

تو جس میں نہ ہو شامل وہ خواب بھی بدلیں گے

شعلوں کی نمائش میں دعویٰ بھی یہ شامل تھا

جو ان کو بجھائے گا وہ آب بھی بدلیں گے

مانگو نہ دعا شاہدؔ گردش سے نکلنے کی

حالات بدلتے ہیں احباب بھی بدلیں گے