jine ke liye jine ke saman bahut hain

jiine ke liye jiine ke sāmān bahut haiñ

ye baat alag log pareshān bahut haiñ

vaise to laboñ par haiñ tabassum kī phuvāreñ

jhāñke jo koī dil meñ to tūfān bahut haiñ

ab un ke taġhāful kā gila un se kareñ kyā

sunte haiñ ki vo ḳhud hī pashemān bahut haiñ

nafrat kī havāoñ se ghirī sham'-e-mohabbat

bujh jaane ke is daur meñ imkān bahut haiñ

karte haiñ gunah rakhte haiñ ummīd-e-karam jo

vo log bhī merī tarah nādān bahut haiñ

le aa.ī hai ab ziist vahāñ par ki jahāñ se

aage ke sabhī rāste vīrān bahut haiñ

vo laakh burā hai to mujhe is se ġharaz kyā

mujh par magar us shaḳhs ke ehsān bahut haiñ

kyoñ un se bichhaḌ kar bhī jiye jaate haiñ 'gulshan'

ham aaj yahī soch ke hairān bahut haiñ

jine ke liye jine ke saman bahut hain

ye baat alag log pareshan bahut hain

waise to labon par hain tabassum ki phuwaren

jhanke jo koi dil mein to tufan bahut hain

ab un ke taghaful ka gila un se karen kya

sunte hain ki wo KHud hi pasheman bahut hain

nafrat ki hawaon se ghiri sham'-e-mohabbat

bujh jaane ke is daur mein imkan bahut hain

karte hain gunah rakhte hain ummid-e-karam jo

wo log bhi meri tarah nadan bahut hain

le aai hai ab zist wahan par ki jahan se

aage ke sabhi raste viran bahut hain

wo lakh bura hai to mujhe is se gharaz kya

mujh par magar us shaKHs ke ehsan bahut hain

kyon un se bichhaD kar bhi jiye jate hain 'gulshan'

hum aaj yahi soch ke hairan bahut hain