جینے کے لیے جینے کے سامان بہت ہیں

جینے کے لیے جینے کے سامان بہت ہیں

یہ بات الگ لوگ پریشان بہت ہیں

ویسے تو لبوں پر ہیں تبسم کی پھواریں

جھانکے جو کوئی دل میں تو طوفان بہت ہیں

اب ان کے تغافل کا گلہ ان سے کریں کیا

سنتے ہیں کہ وہ خود ہی پشیمان بہت ہیں

نفرت کی ہواؤں سے گھری شمع محبت

بجھ جانے کے اس دور میں امکان بہت ہیں

کرتے ہیں گنہ رکھتے ہیں امید کرم جو

وہ لوگ بھی میری طرح نادان بہت ہیں

لے آئی ہے اب زیست وہاں پر کہ جہاں سے

آگے کے سبھی راستے ویران بہت ہیں

وہ لاکھ برا ہے تو مجھے اس سے غرض کیا

مجھ پر مگر اس شخص کے احسان بہت ہیں

کیوں ان سے بچھڑ کر بھی جیے جاتے ہیں گلشنؔ

ہم آج یہی سوچ کے حیران بہت ہیں