jine ke liye jo mar rahe hain

jiine ke liye jo mar rahe haiñ

āġhāz-e-hayāt kar rahe haiñ

hai husn kā naam muft badnām

log apnī talab meñ mar rahe haiñ

ġhunchoñ kī tarah khile the kuchh log

kirnoñ kī tarah bikhar rahe haiñ

hai naqsh-e-qadam pe naqsh-e-zanjīr

dīvāne jidhar guzar rahe haiñ

suntā huuñ ki aap ke vafādār

anjām-e-vafā se Dar rahe haiñ

sāhil ko bhī chhoḌte nahīñ log

kashtī pe bhī paañv dhar rahe haiñ

ab dasht meñ narm-rau havā se

kuchh naqsh-e-qadam nikhar rahe haiñ

rūhoñ meñ na.ī sahar ke baa.is

zehnoñ ke nashe utar rahe haiñ

ham jaise tamām nām-levā

dhabbā tire naam par rahe haiñ

ḳhushbū se ladī bahār meñ bhī

ham dard se bahra-var rahe haiñ

har daur ke fan-shanās 'dānish'

nākām-e-husūl-e-zar rahe haiñ

jine ke liye jo mar rahe hain

aaghaz-e-hayat kar rahe hain

hai husn ka nam muft badnam

log apni talab mein mar rahe hain

ghunchon ki tarah khile the kuchh log

kirnon ki tarah bikhar rahe hain

hai naqsh-e-qadam pe naqsh-e-zanjir

diwane jidhar guzar rahe hain

sunta hun ki aap ke wafadar

anjam-e-wafa se Dar rahe hain

sahil ko bhi chhoDte nahin log

kashti pe bhi panw dhar rahe hain

ab dasht mein narm-rau hawa se

kuchh naqsh-e-qadam nikhar rahe hain

ruhon mein nai sahar ke bais

zehnon ke nashe utar rahe hain

hum jaise tamam nam-lewa

dhabba tere nam par rahe hain

KHushbu se ladi bahaar mein bhi

hum dard se bahra-war rahe hain

har daur ke fan-shanas 'danish'

nakaam-e-husul-e-zar rahe hain