jine ki thi jo dil mein tamanna wo mar gai

jiine kī thī jo dil meñ tamannā vo mar ga.ī

tum kyā ga.e ki 'ishq kī duniyā bikhar ga.ī

allāh us nigāh kī tāsīr kyā kahūñ

siine ko chīrtī huī dil meñ utar ga.ī

bāb-e-qubūl pā na sakī merī ek aah

har chand laḌkhaḌātī huī dar-ba-dar ga.ī

siine pe us ne dast-e-hinā.ī jo rakh diyā

dil kī zamīn bū-e-mohabbat se bhar ga.ī

aaya na kuchh ḳhayāl tujhe sochne ke baa'd

dekhā tujhī ko ham ne jahāñ tak nazar ga.ī

kis darja haul-nāk thā manzar hayāt kā

dahshat ke maare maut mujhe dekh Dar ga.ī

'yāsir' huā ye fā.eda rone se 'ishq meñ

aañsū bahe to chehre kī rangat nikhar ga.ī

kaT hī na paa.ī ek ye zālim shab-e-firāq

sau baar ham pe aa ke qayāmat guzar ga.ī

jine ki thi jo dil mein tamanna wo mar gai

tum kya gae ki 'ishq ki duniya bikhar gai

allah us nigah ki tasir kya kahun

sine ko chirti hui dil mein utar gai

bab-e-qubul pa na saki meri ek aah

har chand laDkhaDati hui dar-ba-dar gai

sine pe us ne dast-e-hinai jo rakh diya

dil ki zamin bu-e-mohabbat se bhar gai

aaya na kuchh KHayal tujhe sochne ke ba'd

dekha tujhi ko hum ne jahan tak nazar gai

kis darja haul-nak tha manzar hayat ka

dahshat ke mare maut mujhe dekh Dar gai

'yasir' hua ye faeda rone se 'ishq mein

aansu bahe to chehre ki rangat nikhar gai

kaT hi na pai ek ye zalim shab-e-firaq

sau bar hum pe aa ke qayamat guzar gai