jine ko diya usne sahaara bhi nahin hai

jiine ko diyā us ne sahārā bhī nahīñ hai

aur saañs kī suulī se utārā bhī nahīñ hai

maiñ roz kī roTī meñ bhulā baiThā huuñ sab ko

ab koī mujhe jaan se pyārā bhī nahīñ hai

dariyā-e-mohabbat meñ utar aa.e to dekhā

tā-hadd-e-nazar koī kinārā bhī nahīñ hai

har saañs aTaktī hai isī vahm pe lekin

us ne to mirā naam pukārā bhī nahīñ hai

mushtarka virāsat hai sabhī ahl-e-junūñ kī

mansūr kā maqtal pe ijāra bhī nahīñ hai

ab dard-e-mohabbat kī davā kaun ḳharīde

bastī meñ koī dard kā maarā bhī nahīñ hai

vo māh-jabīñ laakh hasīñ laakh javāñ ho

is shahr meñ saanī to hamārā bhī nahīñ hai

jine ko diya us ne sahaara bhi nahin hai

aur sans ki suli se utara bhi nahin hai

main roz ki roTi mein bhula baiTha hun sab ko

ab koi mujhe jaan se pyara bhi nahin hai

dariya-e-mohabbat mein utar aae to dekha

ta-hadd-e-nazar koi kinara bhi nahin hai

har sans aTakti hai isi wahm pe lekin

us ne to mera nam pukara bhi nahin hai

mushtarka wirasat hai sabhi ahl-e-junun ki

mansur ka maqtal pe ijara bhi nahin hai

ab dard-e-mohabbat ki dawa kaun KHaride

basti mein koi dard ka mara bhi nahin hai

wo mah-jabin lakh hasin lakh jawan ho

is shahr mein sani to hamara bhi nahin hai