jit baKHshe jo charaghon ko hawa zindabaad

jiit baḳhshe jo charāġhoñ ko havā zindabād

us pe qurbān charāġhoñ kī ziyā zindabād

maiñ ne dushman ko mahārat pe koī daad na dī

mere andar se koī bol paḌā zindabād

us mohabbat ke payambar se taqābul kaisā

dasht sau baar jise kahtā rahā zindabād

ghar kā mālik to mire zabt pe ta.ana-zan thā

ghar kī dīvār ne par mujh se kahā zindabād

jo tire jism ke aurāq paḌhā kartī hai

rashk-e-ḳhushbū hai vo be-misl qabā zindabād

bazm-e-yārāñ meñ mire fan pe hai uñglī uTThī

phir mirī fikr pe bohtān lagā zindabād

mar gayā bhuuk se par bhiik kā luqma na liyā

marne vaale tire kirdār-o-anā zindabād

faisla merā shu.ūrī to nahīñ ho saktā

jis ko thī maat huī us ko likhā zindabād

kar le manzūr sanā-ḳhvānī-e-'kāzim' ko husain

tū bhī zinda hai tirī karb-o-balā zindabād

jit baKHshe jo charaghon ko hawa zindabaad

us pe qurban charaghon ki ziya zindabaad

main ne dushman ko mahaarat pe koi dad na di

mere andar se koi bol paDa zindabaad

us mohabbat ke payambar se taqabul kaisa

dasht sau bar jise kahta raha zindabaad

ghar ka malik to mere zabt pe tana-zan tha

ghar ki diwar ne par mujh se kaha zindabaad

jo tere jism ke auraq paDha karti hai

rashk-e-KHushbu hai wo be-misl qaba zindabaad

bazm-e-yaran mein mere fan pe hai ungli uTThi

phir meri fikr pe bohtan laga zindabaad

mar gaya bhuk se par bhik ka luqma na liya

marne wale tere kirdar-o-ana zindabaad

faisla mera shuuri to nahin ho sakta

jis ko thi mat hui us ko likha zindabaad

kar le manzur sana-KHwani-e-'kazim' ko husain

tu bhi zinda hai teri karb-o-bala zindabaad