jite hain tere pyar ki KHairaat se faqir

jiite haiñ tere pyaar kī ḳhairāt se faqīr

baiThe haiñ lau lagā.e tirī zaat se faqīr

tishna-labī ne phir yahāñ Dere lagā liye

haiñ dil-girafta hijr ke lamhāt se faqīr

haiñ jān-levā ziist kī ye talḳhiyāñ magar

rote nahīñ haiñ tangī-e-hālāt se faqīr

sūrat banā ke kāñch kī toḌā gayā kabhī

maġhlūb ho ga.e kabhī jazbāt se faqīr

zulm-o-sitam kī intihā kiije huzūr aap

kundan baneñge dard kī sauġhāt se faqīr

ummīd ke charāġh jalāte haiñ baam par

Darte nahīñ havāoñ ke ḳhadshāt se faqīr

furqat meñ ek umr se jalte rahe magar

ḳhush ho ga.e bas ek mulāqāt se faqīr

jām-o-subū-o-sāġhar-o-mīnā-o-mai-kada

rahte haiñ duur shahr-e-ḳhurāfāt se faqīr

vo log bhī 'fahīm' baḌe bā-kamāl haiñ

laḌte haiñ sub.h-o-shām jo sadmāt se faqīr

jite hain tere pyar ki KHairaat se faqir

baiThe hain lau lagae teri zat se faqir

tishna-labi ne phir yahan Dere laga liye

hain dil-girafta hijr ke lamhat se faqir

hain jaan-lewa zist ki ye talKHiyan magar

rote nahin hain tangi-e-haalat se faqir

surat bana ke kanch ki toDa gaya kabhi

maghlub ho gae kabhi jazbaat se faqir

zulm-o-sitam ki intiha kije huzur aap

kundan banenge dard ki saughat se faqir

ummid ke charagh jalate hain baam par

Darte nahin hawaon ke KHadshat se faqir

furqat mein ek umr se jalte rahe magar

KHush ho gae bas ek mulaqat se faqir

jam-o-subu-o-saghar-o-mina-o-mai-kada

rahte hain dur shahr-e-KHurafat se faqir

wo log bhi 'fahim' baDe ba-kamal hain

laDte hain subh-o-sham jo sadmat se faqir