jiwan ke kai raaz batata hai jazira

jīvan ke ka.ī raaz batātā hai jazīra

shā.ir ko na.ī raah sujhātā hai jazīra

kyā daur hai ḳhud mauj lagātī hai ye tohmat

duniyā meñ bahut shor machātā hai jazīra

allāh kī taḳhlīq kā andāz to dekho

vo aab kī khetī meñ ugātā hai jazīra

jīvan kā safar dukh ke samundar meñ hai aksar

mīloñ meñ kabhī ḳhushiyoñ kā aatā hai jazīra

ho narġha-e-bātil meñ khaḌā jaise mujāhid

maujoñ meñ yūñhī sar ko uThātā hai jazīra

har shab tirī yādoñ ke samundar meñ utar kar

ik pārā-e-dil ḳhud ko banātā hai jazīra

baiThā hai hasīñ koī samundar ke kināre

uTh uTh ke jise dekhtā jaatā hai jazīra

mahbūb se jab pūchhtā huuñ ishq kā anjām

uñglī ke ishāre se dikhātā hai jazīra

ai mere 'nabīl' aap ke jaisā hī sadā se

tanhā.ī kā ġham roz uThātā hai jazīra

jiwan ke kai raaz batata hai jazira

shair ko nai rah sujhata hai jazira

kya daur hai KHud mauj lagati hai ye tohmat

duniya mein bahut shor machata hai jazira

allah ki taKHliq ka andaz to dekho

wo aab ki kheti mein ugata hai jazira

jiwan ka safar dukh ke samundar mein hai aksar

milon mein kabhi KHushiyon ka aata hai jazira

ho nargha-e-baatil mein khaDa jaise mujahid

maujon mein yunhi sar ko uThata hai jazira

har shab teri yaadon ke samundar mein utar kar

ek para-e-dil KHud ko banata hai jazira

baiTha hai hasin koi samundar ke kinare

uTh uTh ke jise dekhta jata hai jazira

mahbub se jab puchhta hun ishq ka anjam

ungli ke ishaare se dikhata hai jazira

ai mere 'nabil' aap ke jaisa hi sada se

tanhai ka gham roz uThata hai jazira