jila-watan hun mera ghar pukarta hai mujhe

jilā-vatan huuñ mirā ghar pukārtā hai mujhe

udaas naam khulā dar pukārtā hai mujhe

kisī kī chaap musalsal sunā.ī detī hai

safar meñ koī barābar pukārtā hai mujhe

sadaf huuñ lahreñ dar-e-jism khaTkhaTātī haiñ

kanār-e-āb vo gauhar pukārtā hai mujhe

har ek moḌ mire paañv se lipaTtā hai

har ek miil kā patthar pukārtā hai mujhe

phañsā huā hai mire haath kī lakīroñ meñ

mirā humā-e-mqaddar pukārtā hai mujhe

na jaane kyā thā ki maiñ dūriyoñ meñ kho aayā

vo apne paas bulā kar pukārtā hai mujhe

chalī hai shām-e-shafaq-rañg bādbāñ le kar

dabīz shab kā samundar pukārtā hai mujhe

paroñ kā bojh jhaTak kar maiñ uḌ gayā huuñ 'nasīm'

zamīn par mirā paikar pukārtā hai mujhe

jila-watan hun mera ghar pukarta hai mujhe

udas nam khula dar pukarta hai mujhe

kisi ki chap musalsal sunai deti hai

safar mein koi barabar pukarta hai mujhe

sadaf hun lahren dar-e-jism khaTkhaTati hain

kanar-e-ab wo gauhar pukarta hai mujhe

har ek moD mere panw se lipaTta hai

har ek mil ka patthar pukarta hai mujhe

phansa hua hai mere hath ki lakiron mein

mera huma-e-mqaddar pukarta hai mujhe

na jaane kya tha ki main duriyon mein kho aaya

wo apne pas bula kar pukarta hai mujhe

chali hai sham-e-shafaq-rang baadban le kar

dabiz shab ka samundar pukarta hai mujhe

paron ka bojh jhaTak kar main uD gaya hun 'nasim'

zamin par mera paikar pukarta hai mujhe