jin dinon dil se teri yaad juDi rahti thi

jin dinoñ dil se tirī yaad juḌī rahtī thī

merī har raat sitāroñ se bharī rahtī thī

ek saaya bhī bhaTaktā thā galī meñ shab bhar

ek khiḌkī bhī bahut der khulī rahtī thī

baa'd meñ 'ishq ne rasta bhī dikhāyā ham ko

avval avval baḌī be-rāh-ravī rahtī thī

jin dinoñ sabr kī talqīn pe likhtā thā maiñ

ek buḌhiyā mirī chaukhaT pe khaḌī rahtī thī

yaad hai aaj bhī vo milnā-milānā apnā

merī jholī tire phūloñ se bharī rahtī thī

khiḌkiyāñ khol diiñ ik roz tirī yādoñ kī

baḌī sunsān 'asar' dil kī galī rahtī thī

jin dinon dil se teri yaad juDi rahti thi

meri har raat sitaron se bhari rahti thi

ek saya bhi bhaTakta tha gali mein shab bhar

ek khiDki bhi bahut der khuli rahti thi

ba'd mein 'ishq ne rasta bhi dikhaya hum ko

awwal awwal baDi be-rah-rawi rahti thi

jin dinon sabr ki talqin pe likhta tha main

ek buDhiya meri chaukhaT pe khaDi rahti thi

yaad hai aaj bhi wo milna-milana apna

meri jholi tere phulon se bhari rahti thi

khiDkiyan khol din ek roz teri yaadon ki

baDi sunsan 'asar' dil ki gali rahti thi