جن دنوں دل سے تری یاد جڑی رہتی تھی

جن دنوں دل سے تری یاد جڑی رہتی تھی

میری ہر رات ستاروں سے بھری رہتی تھی

ایک سایہ بھی بھٹکتا تھا گلی میں شب بھر

ایک کھڑکی بھی بہت دیر کھلی رہتی تھی

بعد میں عشق نے رستہ بھی دکھایا ہم کو

اول اول بڑی بے راہروی رہتی تھی

جن دنوں صبر کی تلقین پہ لکھتا تھا میں

ایک بڑھیا مری چوکھٹ پہ کھڑی رہتی تھی

یاد ہے آج بھی وہ ملنا ملانا اپنا

میری جھولی ترے پھولوں سے بھری رہتی تھی

کھڑکیاں کھول دیں اک روز تری یادوں کی

بڑی سنسان اثرؔ دل کی گلی رہتی تھی