jin dinon lafzon mein aks-e-surKHi-e-ruKHsar tha

jin dinoñ lafzoñ meñ aks-e-surḳhī-e-ruḳhsār thā

merī taḳhlīqāt kā har naqsh ik shahkār thā

dil tujhe pā kar bhī terī justujū kartā rahā

tere dīvāne ko jaane tujh se kaisā pyaar thā

kyuuñ samajhtā ḳhud ko tanhā zindagī ke dasht meñ

aap hī meñ kārvāñ thā aap hī sālār thā

jazba-o-ehsās mere ham-safar the dosto

zindagī kā rāsta kaise kahūñ dushvār thā

kaise maiñ bāhar nikaltā ab ke mela dekhne

mere andar jab lagā ik dard kā tyauhār thā

kis jagah kis daur meñ yūsuf nahīñ bikte rahe

misr ke bāzār se kam kaun sā bāzār thā

yuuñ to dīvāreñ bahut thiiñ shahr meñ 'shāhid' magar

sar pe yuuñ sūraj thā anqā sāya-e-dīvār thā

jin dinon lafzon mein aks-e-surKHi-e-ruKHsar tha

meri taKHliqat ka har naqsh ek shahkar tha

dil tujhe pa kar bhi teri justuju karta raha

tere diwane ko jaane tujh se kaisa pyar tha

kyun samajhta KHud ko tanha zindagi ke dasht mein

aap hi mein karwan tha aap hi salar tha

jazba-o-ehsas mere ham-safar the dosto

zindagi ka rasta kaise kahun dushwar tha

kaise main bahar nikalta ab ke mela dekhne

mere andar jab laga ek dard ka tyauhaar tha

kis jagah kis daur mein yusuf nahin bikte rahe

misr ke bazar se kam kaun sa bazar tha

yun to diwaren bahut thin shahr mein 'shahid' magar

sar pe yun suraj tha anqa saya-e-diwar tha