جن کا شعور عمر ہے بس ایک رات کا

جن کا شعور عمر ہے بس ایک رات کا

نقشہ اٹھائے پھرتے ہیں وہ کائنات کا

کوئی دلاسہ غم نہ غلط کر سکا مرا

میں فرق جانتا تھا نمک اور دھات کا

تیری بصارتیں مری وسعت سے چھوٹی ہیں

میں آخری کنارہ ہوں اس کائنات کا

اپنے لئے فضائیں الگ ڈھونڈھتا ہوں میں

مجھ کو یقیں نہیں ہے ترے معجزات کا

کون و مکاں میں پھیلی ہوئی ہے مری مہک

کھلتا ہوا گلاب ہوں میں اس کے ہات کا

یہ کائنات جس کی چمک سے چمک اٹھی

وہ ایک بوند پانی تھا پانی بھی رات کا