jin ke panw bhi nahin hain un ko sar kahte hain log

jin ke paañv bhī nahīñ haiñ un ko sar kahte haiñ log

kyā zamāna hai ki paudoñ ko shajar kahte haiñ log

ek aañsū bhī na Tapkā aaj tak jis aañkh se

kyā qayāmat hai usī ko chashm-e-tar kahte haiñ log

ab zamāne kī kasauTī kā yahī me.aar hai

siip se niklā nahīñ phir bhī guhar kahte haiñ log

maslahat kī beḌiyoñ meñ jab se jakḌī hai zabāñ

ham nazar vāloñ ko aksar kam nazar kahte haiñ log

is liye har aañkh se ab niiñd ruḳhsat ho ga.ī

din kī nākāmī kā qissa raat bhar kahte haiñ log

kyā zamāna aa gayā hai pur-sukūñ lahje meñ ab

chaar din kī chāñdnī ko ham-safar kahte haiñ log

jis kī sūrat dekh kar kuchh log pāgal ho ga.e

kuchh na kuchh ham par bhī us kā hai asar kahte haiñ log

farq kyā paḌtā hai is se 'tashna' terī zaat par

kahne de jal kar tujhe kuchh bhī agar kahte haiñ log

jin ke panw bhi nahin hain un ko sar kahte hain log

kya zamana hai ki paudon ko shajar kahte hain log

ek aansu bhi na Tapka aaj tak jis aankh se

kya qayamat hai usi ko chashm-e-tar kahte hain log

ab zamane ki kasauTi ka yahi mear hai

sip se nikla nahin phir bhi guhar kahte hain log

maslahat ki beDiyon mein jab se jakDi hai zaban

hum nazar walon ko aksar kam nazar kahte hain log

is liye har aankh se ab nind ruKHsat ho gai

din ki nakaami ka qissa raat bhar kahte hain log

kya zamana aa gaya hai pur-sukun lahje mein ab

chaar din ki chandni ko ham-safar kahte hain log

jis ki surat dekh kar kuchh log pagal ho gae

kuchh na kuchh hum par bhi us ka hai asar kahte hain log

farq kya paDta hai is se 'tashna' teri zat par

kahne de jal kar tujhe kuchh bhi agar kahte hain log