jin KHwahishon ko dekhti rahti thi KHwab mein

jin ḳhvāhishoñ ko dekhtī rahtī thī ḳhvāb meñ

ab likh rahī huuñ un ko haqīqat ke baab meñ

ik jhiil ke kināre parindoñ ke darmiyāñ

sūraj ko hote dekhā thā tahlīl aab meñ

ḳhvāboñ pe iḳhtiyār na yādoñ pe zor hai

kab zindagī guzārī hai apne hisāb meñ

ik haath us kā jaal pe patvār ek meñ

aur Dūbtā vajūd mirā sail-e-āb meñ

purvā.ī chal ke aur bhī vahshat baḌhā ga.ī

halkī sī aa ga.ī thī kamī iztirāb meñ

āzād haiñ to baaġh kā mausam hī aur hai

ḳhushbū hai tez rañg bhī gahrā gulāb meñ

apnī zamīñ kī āb-o-havā raas hai mujhe

mere liye kashish nahīñ koī sarāb meñ

dekho junūñ meñ un ke khilaune na toḌnā

tum ko raqam kareñge ye bachche kitāb meñ

jin KHwahishon ko dekhti rahti thi KHwab mein

ab likh rahi hun un ko haqiqat ke bab mein

ek jhil ke kinare parindon ke darmiyan

suraj ko hote dekha tha tahlil aab mein

KHwabon pe iKHtiyar na yaadon pe zor hai

kab zindagi guzari hai apne hisab mein

ek hath us ka jal pe patwar ek mein

aur Dubta wajud mera sail-e-ab mein

purwai chal ke aur bhi wahshat baDha gai

halki si aa gai thi kami iztirab mein

aazad hain to bagh ka mausam hi aur hai

KHushbu hai tez rang bhi gahra gulab mein

apni zamin ki aab-o-hawa ras hai mujhe

mere liye kashish nahin koi sarab mein

dekho junun mein un ke khilaune na toDna

tum ko raqam karenge ye bachche kitab mein